ప్రముఖ రచయిత వక్కంతం వంశీ డైరెక్టర్‌గా మారి రూపొందించిన చిత్రం ‘నా పేరు సూర్య’. అప్పటివరకూ చేసిన సినిమాలకు పూర్తి భిన్నంగా ఇందులో బన్నీ నటించాడు. కోపాన్ని అదుపుచేసుకోలేని సైనికుడిగా మెప్పించాడు. ఇందులో అల్లు అర్జున్‌ నటనకు మంచి మార్కులే పడ్డాయి. ఇందులో బన్నీకి జంటగా అను ఇమ్మాన్యూయేల్‌ నటించింది. అర్జున్‌, శరత్‌కుమార్‌, బొమన్ ఇరానీ, రావు రమేష్ ముఖ్య పాత్రలు పోషించారు. విశాల్- శేఖర్‌ ద్వయం సంగీతం అందించింది.

మాటల మాంత్రికుడు త్రివిక్రమ్‌ డైరెక్షన్‌లో జులాయి చిత్రం తెరకెక్కింది. ఇందులో బన్నీ తన అద్భుతమైన నటనతో ఆకట్టుకున్నాడు. ఈ చిత్రానికి దేవిశ్రీ ప్రసాద్‌ సంగీతం అందించాడు. ఇలియానా హీరోయిన్‌గా చేసింది. సోనుసూద్‌, రాజేంద్ర ప్రసాద్‌, ఎం.ఎస్‌. నారాయణ, బ్రహ్మానందం, బ్రహ్మాజీ కీలక పాత్రలు పోషించారు.

అల్లుఅర్జున్‌ నటించిన సూపర్‌ హిట్‌ సినిమాల్లో ‘రేసు గుర్రం’ ఒకటి. సురేంద్ర రెడ్డి దర్శకత్వంలో వచ్చిన ఈ చిత్రం నటుడిగా బన్నీని మరో మెట్టు పైకి ఎక్కించింది. కథ విషయానికి వస్తే.. అన్నదమ్ములైన రామ్(శ్యామ్), లక్కీ(అల్లు అర్జున్) చిన్నప్పటి నుంచి టామ్ అండ్ జెర్రీ తరహాలో కొట్టుకుంటూ ఎదుగుతారు. పెద్దయ్యాక ACPగా ఎదిగిన రామ్.. తన నిజాయితీతో లోకల్ రాజకీయ నాయకుడు శివారెడ్డి(రవికిషన్) కి సమస్యగా మారతాడు. దాంతో శివారెడ్డి అతన్ని అడ్డు తప్పించాలని భావిస్తాడు. ఆ విషయం తెలిసిన తమ్ముడు లక్కీ ఏం చేసాడు? తన అన్నను ఎలా కాపాడుకున్నాడు? అనేది అసలు కథ.